21 февраля 2014

Школьны мерыдыян: Стайская СШ

Што шукае “Пошук”? Каля трох год на базе 10-11 класаў па панядзелках працуе клуб “Пошук”. Зараз “пошукаўцы” займаюцца ўзнаўленнем базы даных пра ўсіх людзей, якія загінулі ў рэгіёне ў гады Вялікай Айчыннай вайны.

Што шукае “Пошук”?

Каля трох год на базе 10-11 класаў  па панядзелках працуе клуб “Пошук”. Зараз “пошукаўцы” займаюцца ўзнаўленнем базы даных пра ўсіх людзей, якія загінулі ў рэгіёне ў гады Вялікай Айчыннай вайны. Звяраюць спісы прозвішчаў з кнігі “Памяць” з інфармацыяй АБД “Мемарыял”. Пошук захапіў дзесяцікласніц Вераніку Бабарэнь, Алесю Залатуха, Ганну Лук’яновіч, Марыю Сільвановіч і іншых. Дзяўчаты сустракаюцца з мясцовымі жыхарамі, трымаюць стасункі з уладамі. Раней дзеці даследвалі мясцовыя прозвішчы і традыцыйныя народныя промыслы ў вёсцы.

Энергамарафон

Вучні ўдзельнічалі ў раённым конкурсе праектаў па эканоміі і ашчаднасці “Энергамарафон”. На конкурс даслалі тры малюнкі, улётку, відэаролік, а таксама праект шасцікласнікаў Яўгена Жарнасека і Аляксея Залатухі “Смецце ці рэсурс”, які заняў першае месца ў намінацыі “Лепшы праект практычных мерапрыемстваў па энергазберажэнні”. Відэароліку “Эканомія энергіі. Што і як мы можам зрабіць”, аўтарамі якога з’яўляецца група васьмікласнікаў, прысуджана трэцяе месца, як, зрэшты, і ўлётцы “Эканом рэсурсы, збяры грошы на адпачынак” дзесяцікласніцы Веранікі Бабарэнь.

Віктар ЛЯШЧЫНА