13 декабря 2011

Вярнуліся з перамогай

Таэквандо – не такі распаўсюджаны від спартыўнай барацьбы, як, напрыклад, дзюдо і самба, але ён не менш цікавы і захапляльны, асабліва для моладзі. Аматары гэтага віду спорту збіраюцца кожныя сераду і пятніцу ў вячэрні час у спартыўнай зале сярэдняй школы №3, каб заняцца агульнафізічнай падрыхтоўкай, удасканаліць свае тактыка-тэхнічныя дзеянні, ды і проста сустрэцца з сябрамі, пагутарыць, абмяняцца навінамі.

 У лістападзе выхаванцы секцыі прынялі ўдзел у міжнародным турніры па таэквандо, які адбыўся ў горадзе Івана-Франкоўск, што на Украіне. На гэтых спаборніцтвах яны дастойна прадставілі Лепельшчыну, усю нашу краіну – заваявалі два залатыя медалі. На гэты раз вызначыліся нашы дзяўчаты, якія ўдала змагаюцца на спартыўных пляцоўках, ні ў чым не ўступаюць хлопцам. Па “Спарынгу” ў вагавай катэгорыі да 30 кілаграмаў ва ўзроставай групе 9-10 гадоў першае месца заняла вучаніца чацвёртага класа СШ №3 Ксенія Галуза і ў вагавай катэгорыі да 35 кілаграмаў, дзе змагаліся дзяўчаты 11-12 гадоў, упэўнена перамагла вучаніца шостага класа СШ №1 Насця Тухта.  

Мікалай ГАРБАЧОЎ (фота аўтара)

На здымку: трэнер Іна Папова (у цэнтры) разам з юнымі спартсменкамі (злева направа) Насцяй Тухта і Ксеніяй Галуза.