16 февраля 2026

Па месцах зімовай рыбалкі

У мэтах папярэджання няшчасных выпадкаў і гібелі людзей на вадаёмах работнікі Лепельскага раённага аддзела па НС сумесна з прадстаўніком таварыства выратавання на водах правялі прафілактычны рэйд па месцах зімовай рыбалкі.

Пры зносінах з аматарамі падлёднай лоўлі асаблівая ўвага надавалася пытанням абавязковай наяўнасці ў іх выратавальных камізэлек і падручных выратавальных сродкаў. Усім рыбакам даводзіліся сумныя факты гібелі людзей па прычыне бестурботнасці і саманадзейнасці, нагадваліся асноўныя меры бяспечных паводзін на лёдзе, парадак дзеянняў у выпадку няштатнай сітуацыі, спосабы ратавання з вады, элементы аказання першай медыцынскай дапамогі.

У сваю чаргу прадстаўнік арганізацыі выратавання на водах звярнуў увагу на тое, што адважныя аматары рыбы пры сабе не маюць нават элементарных сродкаў выратавання. Пагутарыўшы з кожным, каго сустрэлі на вадаёмах, можна было ў адказ пачуць: "Са мной нічога не здарыцца, выходжу на лёд кожны год, у любое надвор'е!".

Таму, каб бяды не здарылася, прадстаўнік МНС яшчэ раз нагадаў, што неабходна выконваць меры бяспекі, а перад выхадам на лёд трэба пераканацца, што ён дастаткова трывалы і, самае галоўнае, мець пры сабе сродкі для выратавання на лёдзе.