У пракуратуры Віцебскай вобласці адбылася ўрачыстая цырымонія ўзнагароджання пераможцаў Віцебскага рэгіянальнага этапа маладзёжнага творчага конкурсу «Памятаць. Шанаваць. Не дапусціць».
Ён быў прымеркаваны да Года міру і стварэння і 80-годдзю пачатку вызвалення Беларусі ад нямецка-фашысцкіх захопнікаў. На конкурс паступіла 215 работ, у тым ліку 55 у намінацыі «Лепшае даследаванне», 42 - «Лепшы відэаролік», 118 - «Лепшае эсэ», ад навучэнцаў розных рэгіёнаў Віцебшчыны. Навучэнец 11 класа ДУА «Бароўская сярэдняя школа імя Г.К. Жукава» Максім Карусевіч за даследчую працу «Вогненныя» вёскі Лепельшчыны» быў удастоены Дыплома лаўрэата конкурсу.
Узнагароды ўручаў пракурор Віцебскай вобласці Ігар Украінец, які ў прывітальным слове адзначыў, што адчувае гонар за моладзь, якая «неабыякава ставіцца да лёсу сваёй краіны, даследуе, аналізуе і творча садзейнічае захаванню памяці аб гераізме і подзвігу беларускага народа».
-- Дзякую рабятам і педагогам за праробленую працу, арыгінальнасць задумы, удумлівы і эмацыйны падыход пры падрыхтоўцы работ, актыўную пазіцыю ў вывучэнні гісторыі нашай Радзімы і жадаю ўдачы на рэспубліканскім этапе конкурсу!, - пазначыў Ігар Украінец.
Падрыхтавала Наталля Храпавіцкая. Газета «Лепельскі край»