У сярэдняй школе №1 г. Лепеля адбылася адкрытая дыялогавая пляцоўка для навучэнцаў школ горада, у тым ліку ў дачыненні да якіх праводзіцца індывідуальная прафілактычная работа.

Тэма гутаркі - "Учора - свавольства. Сёння - адказнасць. А заўтра?". П'янства, крадзяжы, хуліганства, парушэнне ПДР, абраза… Гэта далёка не ўвесь спіс тэм, якія ўзнялі прадстаўнікі кампетэнтных органаў. Першай выступіла перад навучэнцамі Таццяна Часнакова, намеснік старшыні КСН, якая расказала пра стан злачыннасці сярод непаўналетніх у нашым раёне. Так, хлопцы даведаліся, што за 12 месяцаў 2023 года на пасяджэннях КСН разгледжаны 173 матэрыялы, з іх 102 матэрыялы разгледжаны ў адносінах да 64 дзяцей. Пры тым некаторыя навучэнцы разглядаліся на пасяджэнні КСН неаднаразова. За 3 месяцы 2024 года разгледжана 45 матэрыялаў, з іх 32 — у адносінах да непаўналетніх. На ўліку ў ІСН на 1 красавіка стаяць 38 непаўналетніх. У ходзе размовы Таццяна Мікалаеўна нагадала аб адказнасці непаўналетніх за правапарушэнні, азнаёміла з пералікам самых частых правапарушэнняў, якія ўчыняюць падлеткі ў нашым раёне, заклікала школьнікаў выконваць правілы бяспечных паводзін.

Затым старшы памочнік пракурора Лепельскага раёна Карына Грышкевіч расказала аб правапарушэннях і злачынствах, якія ўчыняюцца непаўналетнімі, а таксама аб дэструктыўных праявах сярод непаўналетніх. У прыватнасці, Карына Віктараўна на зразумелай для маладых людзей мове расказала аб крымінальнай і адміністрацыйнай адказнасці, прававой і адміністрацыйнай адказнасці. Акцэнтавала ўвагу на рэальных злачынствах, за якія суд можа прызначыць пакаранне ў выглядзе пазбаўлення волі, у тым ліку звязаных з незаконным абаротам наркатычных сродкаў і псіхатропных рэчываў.

Намеснік начальніка Лепельскага раённага аддзела Следчага камітэта Аляксандр Патоцкі расказаў аб наступствах учыненых правапарушэнняў і злачынстваў непаўналетніх. Закранулі і тэму злачынства супраць палавой недатыкальнасці непаўналетніх. Падлеткам было растлумачана, з якіх гадоў надыходзіць крымінальная адказнасць і якія пакаранні прымяняюцца за ўчыненне злачынстваў. Таксама былі закрануты пытанні паводзін навучэнцаў у школе і грамадскіх месцах, паважлівага і карэктнага стаўлення да дарослых і аднагодкаў. Гутарка засноўвалася на пэўных прыкладах і фактах.

Аб уцягванні падлеткаў у незаконны наркаабарот, аб знаходжанні і паводзінах непаўналетніх у грамадскіх месцах расказаў начальнік ІСН Лепельскага раёна Анатоль Бурмістраў. Падлеткі рэгулярна атрымліваюць прапановы стаць распаўсюджвальнікамі наркотыкаў, гэта значыць закладчыкамі. Вельмі важна навучыцца казаць не і не паддавацца негатыўным спакусам. Далучайцеся да спорту і іншых карысных, цікавых заняткаў, - акцэнтаваў увагу Анатоль Міхайлавіч, а таксама растлумачыў, якая адказнасць прадугледжана ў Рэспубліцы Беларусь за ўчыненне дзеянняў экстрэмісцкага характару, парушэнне парадку арганізацыі масавых мерапрыемстваў і мітынгаў, распаўсюджванне інфармацыі экстрэмісцкага характару праз Інтэрнет.

Таксама спікеры звярнулі ўвагу рабят на наступствы распівання алкагольных, слабаалкагольных напояў ці піва ў грамадскіх месцах. І заклікалі іх больш адказна ставіцца да свайго жыцця, думаць, перш чым згаджацца на штосьці. 

- З якога ўзросту могуць адправіць падлетка ў спецустанову? - паступіла пытанне з залы.

- У спецыяльныя навучальна-выхаваўчыя ўстановы змяшчаюцца непаўналетнія, якія маюць патрэбу ў асаблівых умовах выхавання, ва ўзросце ад адзінаццаці да васемнаццаці гадоў, - адказала Таццяна Мікалаеўна. 

- Да якога часу можна гуляць на вуліцы непаўналетнім? 

- Непаўналетнія ва ўзросце да 16 гадоў не могуць знаходзіцца па-за жыллём без суправаджэння дарослых у перыяд з 23.00 да 6 раніцы, - растлумачыў Анатоль Міхайлавіч. 

- Калі я слухаю музыку і не ведаю, што яна з'яўляецца экстрэмісцкай? 

- Ня веданне закона не вызваляе ад адказнасці. На сайце Міністэрства інфармацыі ёсць рэспубліканскі спіс экстрэмісцкіх матэрыялаў, - дадаў Анатоль Бурмістраў.
***
Як адзначылі эксперты, такі фармат падабаецца дзецям значна больш, чым звычайныя выступленні. Тут яны могуць быць не проста слухачамі, але і ўдзельнікамі размовы. Чаму для вучняў сярэдніх і старэйшых класаў? Бо ў гэтым узросце ў падлеткаў ужо ёсць сваё бачанне сітуацыі і ім важна выказацца. Акрамя гэтага, менавіта з гэтага ўзросту дзеці часцей за ўсё трапляюць у поле зроку міліцыі. 

Наталля Храпавіцкая. Газета "Лепельскі край"