Штогод 15 мая адзначаецца Міжнародны дзень сям'і, які заснаваны Генеральнай Асамблеяй ААН у 1993 годзе. Традыцыйна на Лепельскай зямлі праходзіць шэраг мерапрыемстваў, прысвечаных гэтаму святу: выставы, сустрэчы, канцэрты, узнагароджанні, падарункі.

З года ў год лепяльчане справай паказваюць сваю прыхільнасць сямейным каштоўнасцям. Так, у  2021 годзе пабраліся шлюбам 182 пары, з іх палова (92 пары) узялі шлюб упершыню. Большасць (151 пара) аддалі перавагу роспісу ў гарадскім загсе, хоць сельвыканкамы таксама могуць рэгістраваць шлюбы. Традыцыйна самымі «гарачымі» месяцамі былі чэрвень, ліпень і жнівень, на якія прыпала палова ўсіх зарэгістраваных у 2021 годзе вяселляў.

Сям'я – гэта наш родны дом, у якім выхоўваюцца дзеці, перадаюцца з пакалення ў пакаленне найважнейшыя маральныя і духоўныя традыцыі, месца, дзе мы вучымся любові, павазе, узаемадапамозе.  

У Рэспубліцы Беларусь падтрымка сям'і з'яўляецца нацыянальным прыярытэтам. У гэтых мэтах рэалізуецца вялікі комплекс мер з асаблівым акцэнтам на шматдзетныя сем'і:

- выплата дапамог у сувязі з нараджэннем і выхаваннем дзяцей;

- прадастаўленне сямейнага капіталу шматдзетным сем'ям;

- сацыяльнае абслугоўванне сем'яў з дзецьмі;

- дзяржаўная падтрымка пры будаўніцтве (рэканструкцыі) жылля;

- забеспячэнне бясплатным харчаваннем дзяцей першых двух гадоў жыцця і іншыя віды дзяржаўнай адраснай сацыяльнай дапамогі;

- гарантыі ў сферы адукацыі, аховы здароўя, пенсіённага, працоўнага, падатковага і жыллёвага заканадаўства.