У рамках Года якасці ў нашай краіне праходзіць рэспубліканская акцыя "Мая сям'я - мая краіна", мэтай якой з'яўляецца аб'яднанне намаганняў дзяржаўных органаў і грамадскіх арганізацый для павышэння значнасці сацыяльнага інстытута сям'і як асновы дзяржавы, захавання сямейных каштоўнасцей, папулярызацыі вобраза моцнай шчаснай сям'і.
У рамках акцыі праводзіцца шэраг значных мерапрыемстваў, накіраваных на ўмацаванне інстытута сям'і. Так, у Лепелі ў Дзень сям'і з'явіліся сямейныя дрэвы. І набіраюць сілу маладыя расліны ў святым месцы - на тэрыторыі храма Святой Параскевы Пятніцы. Ініцыятарамі такой добрай акцыі сталі Лепельскае раённае аб'яднанне прафсаюзаў і духавенства.
Сутнасць акцыі, паводле слоў арганізатараў, паказаць сваё трапяткое стаўленне да сямейных каштоўнасцяў, бо пасаджаныя дрэўцы будуць расці, а разам з імі - мацнець нашы сем'і.
З прывітальным словам да ўдзельнікаў звярнуліся намеснік старшыні Віцебскага абласнога аб'яднання прафсаюзаў Віктар Лугаўцоў і благачынны Лепельскай акругі протаіерэй Сергій Ляшкевіч.
Яны адзначылі, што сям'я, клопат, узаемная павага, згода і любоў блізкіх – галоўная апора і падтрымка чалавека. А шчасная сям'я - аснова моцнай дзяржавы. Закладзеныя ў сям'і каштоўнасці клопату аб дзецях, павагі да старэйшых, пераемнасці пакаленняў становяцца традыцыямі, на якіх будуецца стабільнае грамадства, моцная і квітнеючая краіна.
У пасадцы дрэў прынялі ўдзел 15 сем'яў. Маладыя дрэўцы высаджваліся старанна, дзеці дапамагалі сваім бацькам і вельмі перажывалі, каб расліны прыжыліся. Мерапрыемства атрымалася яркім і запамінальным, бо дрэва - гэта сімвал жыцця, сям'і і сілы. Прыемна, што акцыя сабрала жыхароў нашага горада рознага ўзросту ад маленькіх дзяцей да людзей паважанага веку.
Так, паўдзельнічаць у такой карыснай справе вырашыла сям'я Пшонка. Нягледзячы на тое, што клопатаў у мужа i жонкi хапае, не змаглі застацца ўбаку.
— Такое баўленне часу - гэта не толькі карысная справа, але і прывіццё пэўных сямейных каштоўнасцяў. Не першы год удзельнічаем у такіх мерапрыемствах, і заўсёды ад іх атрымліваем толькі станоўчыя эмоцыі, - кажа Вікторыя Віктараўна.
— Няхай наш любімы горад з кожным годам становіцца яшчэ зелянейшым і прыгажэйшым. І асабліва такія памятныя і святыя мясціны. І няхай закладзены парк сямейных дрэў расце і радуе вока нашых гараджан. А мы па магчымасці будзем даглядаць за сваімі дрэвамі, аберагаць і паліваць іх у сухое надвор'е, - дадаў муж Сяргей Васільевіч.
Удзельнік акцыі - Глеб Раманенка, які разам з бацькамі Сяргеем і Аленай, а таксама братам Іванам далучыліся да добрай справы. Хлопчык расказаў, што першы раз садзіць сямейнае дрэва.
- Я яшчэ ні разу не садзіў дрэва, а сёння буду. Тут вельмі цікава, - падзяліўся думкамі Глеб. - Ён прызнаўся, што вельмі любіць бацькоў і шчаслівы бавіць з імі час, тым больш такім чынам.
- Нас перапаўняюць эмоцыі радасці і шчасця за сваю сям'ю. Мы ганарымся, што нам даверылі ўдзел у такім важным мерапрыемстве. А яшчэ ў моцных сем'ях растуць шчаслівыя дзеці, фарміруецца аснова нашай будучыні, - адзначыла сям'я Палтарак - Аляксей, Вольга і іх дзеці. Муж i жонка працуюць у Лепельскім лясгасе, таму у сям'і з дзяцінства прывіваюцца беражлівыя адносіны да лесу і прыроды.
- Для нас гэта не проста пасадка дрэўца, а важная падзея ў гісторыі нашай сям'і! Сыну вельмі спадабалася мерапрыемства, новыя знаёмствы, прыязная атмасфера, - кажа сям'я Прускіх - Вікторыя і Цімафей.
- Такія акцыі аб'ядноўваюць нас, гуртуюць беларускі народ, старэйшае і малодшае пакаленне. Таму ўдзел у акцыі бяруць маладыя сем'і. Важна, што разам садзім дрэвы і тым самым дорым любiмаму гораду часцінку свайго сэрца. Высаджаныя дрэвы стануць сімваламі кахання і сямейнага шчасця, а расліны будуць радаваць наведвальнікаў храма, жыхароў і гасцей горада, - акцэнтавала першы сакратар РК ГА "БРСМ" Дар'я Мазго.
Пасля пасадкі айцец Сергій усім сем'ям падарыў Святое Евангелле і правёў экскурсію па храме.
Наталля Храпавіцкая. Газета "Лепельскі край"