Лепельскі раённы краязнаўчы музей пачынае стварэнне новай экспазіцыі «Школьны музей». Каб абмеркаваць праект, сёння сустрэліся прадстаўнікі раённай улады, адміністрацыя музея, гісторыкі і краязнаўцы, а таксама прадстаўнікі ўстаноў адукацыі раёна.
- Гісторыка-краязнаўчая работа сёння годна вядзецца ва ўсіх нашых школах, цэнтрах, садах. Тым не менш, галоўнай фігурай усёй гэтай дзейнасці па праве з'яўляецца наш музей. Усё, што тут сёння знаходзіцца – гэта нашая гісторыя, гісторыя, якую пішам мы самі.
Ваш прамы ўдзел патрабуецца і зараз, у перыяд стварэння новай экспазіцыі «Школьны музей». Усё, чым вы, дарагія калегі, падзеліцеся, стане спадчынай. А значыць тым, што ніколі не забудзецца, не згубіцца, – звярнуўся да запрошаных Віктар Азаронак, намеснік старшыні райвыканкама.
Таксама Віктар Уладзіміравіч, прыадчыніў заслону таямніцы і крыху распавёў аб тым, што ж з сябе будзе ўяўляць новая экспазіцыя. У зале размесціцца драўляная парта, у стальніцу якой будзе ўбудавана інтэрактыўная панэль. Інфармацыйным «начыннем» дадзенага экрана стане якраз тое, чым падзеляцца лепельчане — фатаграфіі, гісторыі стварэння школ, спісы знакамітых выпускнікоў, унікальныя адукацыйныя дакументы і гэтак далей.
Такім чынам, сістэма адукацыі нашага раёна сістэматызуе сваю гістарычную спадчыну і перадасць яе ў надзейныя рукі. А педагогі здабудуць упэўненасць у тым, што пра іх не забудуць, пра іх раскажуць нашчадкам праз дзясяткі, а можа, сотні гадоў.
Акрамя таго, экспазіцыя ў сябе ўключыць цікавыя рэчы школьнага ўжытку. Гэта можа быць школьная форма, ранцы, абутак, сшыткі, падручнікі і шматлікае іншае.
- Хацелася б, каб новая зала была зроблены з душой. Каб, наведваючы яе, чалавек акунуўся ў тую эпоху, тую атмасферу, калі ён сам ці яго мамы і таты былі яшчэ дзецьмі. Давайце не будзем абыякавымi і разам упішам гэту старонку ў летапіс раёна, - дадаў Віктар Уладзіміравіч.
Многія педагогі тут жа ўключыліся ў абмеркаванне - хтосці ўспомніў аб сваёй школьнай форме, якая захоўваецца на далёкіх паліцах, хтосці ўспомніў аб выпускніках сваіх школ, якія зараз з'яўляюцца высокапастаўленымі чыноўнікамі або вядомымі спартсменамі, а нехта ўспомніў цікавыя апавяданні сваіх бабуль і дзядуль, пра тое, як яны былі вучнямі.
Многія сельскія школы Лепельскага раёна, нажаль, ужо спынілі дзейнасць. Але памяць аб іх жыве ў нас. Таму так важна прыняць удзел у стварэнні новай экспазіцыі і перадаць звестках аб іх.
Яна Міснік. Газета «Лепельскі край»