У Віцебску назвалі пераможцаў XXXIII Міжнароднага фестывалю сучаснай харэаграфіі. Гран-пры паедзе ў Цюмень, І і ІІ прэміі паміж сабой падзялілі па два калектывы. Цырымонія ўзнагароджвання лаўрэатаў адбылася 27 лістапада на канцэрце закрыцця форуму, перадае карэспандэнт БЕЛТА.

Гран-пры фестывалю ўручылі тэатру танца "Праспект" з Цюмені за работу "Усялякае дзеянне нараджае процідзеянне". Узнагароджваючы пераможцаў, старшыня журы конкурсу, заслужаны артыст Расіі, прэм'ер Марыінскага тэатра, галоўны балетмайстар Нацыянальнага акадэмічнага Вялікага тэатра оперы і балета Беларусі Ігар Колб адзначыў, што асабіста спрабаваў пражыць усе тыя гісторыі, якія прапаноўвалі ўдзельнікі.

Праект Яўгеніі Нікалайчук з Мінска і магілёўскі народны харэаграфічны ансамбль "Алеся" падзялілі І прэмію. Уладальнікамі ІІ прэміі сталі тульскі калектыў - танцавальная кампанія "НІКА dance company" і Праект Дзяніса Чарнышова з Чэлябінска. Мінскаму тэатру танца "Альтана" прысудзілі ІІІ прэмію міжнароднага конкурсу сучаснай харэаграфіі.

Некалькі калектываў атрымалі асобныя ўзнагароды IFMC. У прыватнасці, спецыяльную прэмію Яўгена Панфілава павязе праект Валянціна Ісакава "Х-перЫменты" і Гомельскага дзяржаўнага каледжа мастацтваў імя Н.Ф. Сакалоўскага. Уладальнікам спецыяльнай прэміі "Перспектыва" стаў ансамбль кафедры харэаграфіі Беларускага дзяржаўнага ўніверсітэта культуры і мастацтваў. А трупа сучаснага танца "Самрук" з Алматы ўдастоена спецыяльнай прэміі "За стылявую разнастайнасць у рэпертуары". Асобна спецпрэміяй "За выкарыстанне фальклорнай каранёвай культуры ў сучасным танцы" ўзнагародзілі екацярынбургскую танцавальную кампанію "Дзянніца".

Міжнародны фестываль сучаснай харэаграфіі IFMC праходзіў у Віцебску з 23 па 27 лістапада.

БелТА