У рамках беларуска-кітайскага супрацоўніцтва поўнаразмерны 62-кантэйнерны поезд з больш як 1,3 тыс.т тарфяной прадукцыі УП "Віцебскаблгаз" упершыню адправіўся са станцыі "Орша-Усходняя ў Кітай", паведамілі БЕЛТА ў РУП "Белмытнясэрвіс".

"Белмытнясэрвіс" сумесна з "Віцебскаблгаз" рэалізавалі праект па адпраўцы першага кантэйнернага поезда з тарфяной прадукцыяй з Віцебскага рэгіёна. Кантэйнерны поезд пройдзе па тэрыторыі Беларусі, Расіі і Казахстана, праз пагранпераход "Алтынколь-Харгос". Канцавым пунктам на карце стане станцыя Цындаа, дзе чыгуначны састаў прымуць кітайскія партнёры Shanghai Izolite Industrial CO. LTD. Паведамляецца, што састаў пераадолее больш за 8,5 тыс. км за 17 дзён.

З пачатку года "Белмытнясэрвісам" было сфарміравана і адпраўлена 35 кантэйнерных паяздоў з прадукцыяй беларускіх экспарцёраў у Кітай. "Паспяховая арганізацыя праекта - важная зыходная кропка для эканомікі Віцебскага рэгіёна і прасоўвання беларускай экспартнай прадукцыі (тарфяной прадукцыі і іншых тавараў) на рынак Кітая. У перспектыве плануем пашырэнне таварнай наменклатуры экспартнай беларускай прадукцыі і павелічэнне частаты адправак кантэйнерных паяздоў", - расказалі на прадпрыемстве.

"Белмытнясэрвіс" - рэспубліканскае ўнітарнае прадпрыемства, заснаванае Дзяржаўным мытным камітэтам, нацыянальны лагістычны 4PL-аператар, які займае лідзіруючыя пазіцыі на рынку знешнеэканамічнай дзейнасці нашай краіны.

Улічваючы стратэгічнае супрацоўніцтва Беларусі і Кітая ў сферы знешнеэканамічнай дзейнасці, РУП "Белмытнясэрвіс" з 2016 года актыўна развівае праекты ў рамках ініцыятывы "Адзін пояс - адзін шлях" па перавозцы грузаў чыгуначным транспартам у складзе арганізаваных кантэйнерных паяздоў, з'яўляючыся адначасова грузаатрымальнікам/грузаадпраўшчыкам, суаператарам і экспедытарам кантэйнерных паяздоў.

БелТА