Мастакі і дызайнеры прадставяць кітайскія ліхтарыкі на выставе "СіЯй" у Віцебску. Арганізатары праекта агучылі даты правядзення экспазіцыі і крытэрыі адбору работ. Аб гэтым карэспандэнту БЕЛТА паведаміла загадчыца філіяла "Цэнтр нацыянальных культур" Цэнтра культуры "Віцебск" Аліса Стуканава.

Выстава кітайскіх ліхтарыкаў пройдзе ў Віцебску з 28 па 29 студзеня і стане часткай вялікага праекта "Навагодні кірмаш", прымеркаванага да святкавання кітайскага Новага года. "Кітайскі Новы год надыдзе 22 студзеня і прадоўжыцца 15 дзён, кітайцы вельмі шырока яго адзначаюць. Паколькі ў нас ёсць прадстаўнікі КНР - навучэнцы і тыя, хто пражываюць у Віцебску, мы і вырашылі правесці такую інтэграцыю", - адзначыла кіраўнік Цэнтра нацыянальных культур.

Прапанаваць сваю работу для экспазіцыі да 22 студзеня змогуць вучні мастацкіх гурткоў, школ мастацтваў, ВНУ, а таксама прафесіяналы ў сферы дэкору, дызайну, мастакі. "Калі хтосьці з жыхароў Віцебска захоча прыняць удзел у выставе і прынесці свае работы, мы адкрыты для ўсіх, - растлумачыла Аліса Стуканава. - Тэхніка выканання можа быць любой, як і выбраны матэрыял для кітайскага ліхтарыка. Галоўнае - захаваць тэматыку і цэласнасць прадмета, захаваць памеры - работы могуць быць максімум 50 на 100 см".

Усе работы размесцяцца ў холе канцэртнай залы "Віцебск" і будуць даступныя любому жадаючаму. Паводле слоў арганізатараў праекта, там жа будзе арганізавана шоу-праграма з кітайскім драконам, удзелам кітайскіх выканаўцаў. Жыхары і госці абласнога цэнтра змогуць пакаштаваць сапраўдных кітайскіх пельменяў (сімвалу дабрыбыту і дастатку), якімі святкуюць Новы год паўночныя народы Паднябеснай, і загадаць жаданні. "У нас ужо быў вопыт правядзення такой выставы ў час Дзён індыйскай культуры ў Віцебску, у студзені гэтага года. Была арганізавана экспазіцыя, дзе аўтары прадстаўлялі свае работы, выяўленчую творчасць. Удзельнікі паказвалі Індыю такой, якой яны самі яе бачаць. Ну а ў пачатку 2023 года мы вырашылі, паколькі святкуем кітайскі Новы год, даць творчае заданне, заснаванае на кітайскіх ліхтарыках, паколькі гэта неад'емны атрыбут святкавання кітайскага Новага года", - падкрэсліла Аліса Стуканава.

Паводле яе слоў, практыка паказвае, што цікавасць да такіх праектаў, у прыватнасці дзён індыйскай, кітайскай культур, у віцябчан імкліва расце. А рэалізацыя такіх ідэй дае магчымасць умацаваць існуючыя паміж народамі дружалюбныя сувязі.

БелТА