У Музеі гісторыі і культуры Наваполацка з 11 кастрычніка па 10 лістапада будзе прадстаўлена выстава філатэліі і філакартыі "Флора і фаўна" з фондаў музея. Аб гэтым карэспандэнту БЕЛТА паведамілі ва ўстанове культуры.

Для людзей савецкай эпохі калекцыянаванне было адным з важных і масавых хобі. У тыя гады збіралі маркі, паштоўкі, фантыкі ад цукерак, гузікі і шмат іншага. Наогул калекцыянаванне налічвае больш за 110 розных напрамкаў. На выставе ў Наваполацку наведвальнікі змогуць азнаёміцца з філатэліяй (калекцыянаваннем марак) і філакартыяй (калекцыянаваннем паштовак). Экспанаты збіраліся з 1970-х гадоў да 2018 года.

Агульная тэма прасочваецца ва ўсіх выстаўленых прадметах. На паштоўках і марках адлюстраваны птушкі, матылькі і жукі, лекавыя расліны, хараство падводнага і жывёльнага свету.

Прадстаўленыя на выставе маркі былі перададзены з прыватных калекцый у фонды музея. Гэтыя экспанаты паказваюць флору і фаўну не толькі Беларусі, але і іншых краін. Маркі раскажуць аб багатым раслінным і жывёльным свеце Манголіі, Балгарыі, В'етнама, Кубы. Таксама ў калекцыі можна будзе ўбачыць знакі паштовай аплаты абмежаванага тыражу з адлюстраваннем выкапнёвых жывёл.

Спецыяльна для маленькіх наведвальнікаў у музеі прадугледжана інструкцыя-схема, дзякуючы якой можна даведацца, з якіх элементаў складаюцца маркі, і больш дэталёва вывучыць інфармацыю, прадстаўленую на іх.

Выстава будзе цікавая не толькі як знаёмства з калекцыянаваннем, але і ў мастацкім плане. Большая частка выяў паштовак была прыдумана і ўвасоблена ў жыццё ўмелымі майстрамі-мастакамі.

Для жыхароў і гасцей горада выстава будзе адкрыта з аўторка па нядзелю з 10.00 да 18.00.

БелТА