Беларусь і Расія на палях XVIII Міжнароднага форуму і выстаўкі "Транспарт Расіі" падпісалі пагадненні ў галіне развіцця транспарту. Аб гэтым паведамілі БЕЛТА ў прэс-службе Міністэрства транспарту і камунікацый.

Намеснік міністра транспарту і камунікацый Беларусі Сяргей Дубіна і статс-сакратар - намеснік міністра транспарту Расіі Дзмітрый Звераў зацвердзілі парадак інфармавання аб пагрозах учынення і аб учыненні актаў незаконнага ўмяшання ў дзейнасць аб'ектаў транспартнай інфраструктуры дзвюх краін, а таксама транспартных сродкаў, што выкарыстоўваюцца для міжнародных і кабатажных аўтамабільных перавозак грузаў.

Беларускі навукова-даследчы інстытут транспарту "Транстэхніка" і Навукова-даследчы інстытут аўтамабільнага транспарту (РФ) падпісалі пагадненне аб супрацоўніцтве. Дакумент прадугледжвае правядзенне сумесных навуковых даследаванняў, абмен вопытам у галіне выкарыстання інавацый у транспартнай дзейнасці, забеспячэння якасці і даступнасці транспартных паслуг, збалансаванага развіцця розных відаў транспарту і транспартна-лагістычнай інфраструктуры.

"Транспарт Расіі" - важнейшае галіновае мерапрыемства, якое праходзіць з 19 па 21 лістапада ў Маскве. Важную частку дзелавой праграмы форуму занялі пытанні міжнароднага парадку дня, сярод якіх развіццё стратэгічнага партнёрства і інтэграцыя нацыянальных транспартных сістэм у агульную сетку садружнасці. Адбыліся пленарная дыскусія "Транспартнае супрацоўніцтва "СНД плюс": узаемазвязанасць, устойлівасць, эфектыўнасць", пасяджэнне Каардынацыйнай транспартнай нарады СНД, а таксама пасяджэнне Савета кіраўнікоў упаўнаважаных органаў у галіне транспарту ЕАЭС.

Таксама ў час рабочага візіту ў Маскву дэлегацыі Мінтранса Беларусі прайшло пасяджэнне рабочай групы, дзе абмеркавалі рэалізацыю палажэнняў Дагавора аб стварэнні Саюзнай дзяржавы на 2024-2026 гады. Бакі парафіравалі план мерапрыемстваў па ўдасканаленні аўтамабільных дарог Саюзнай дзяржавы на 2024-2026 гады.

БелТА