Больш за 46 тыс. га новых лясоў з'явілася ў Беларусі ў 2020 годзе, паведамілі БЕЛТА ў прэс-службе Міністэрства лясной гаспадаркі.

"Сіламі лясгасаў у 2020 годзе створана каля 38,9 тыс. га новых лясоў. Гэта значна перасягае запланаваны аб'ём. З улікам прыроднага лесааднаўлення новыя лясы з'явіліся на плошчы большай за 46,7 тыс. га, - расказалі ў прэс-службе. - Пераважная большасць створаных лясных культур адносіцца да хвойных і цвердалістых парод (97,6 працэнта), доля мяккалістых склала ўсяго 2,4 працэнта ад агульнай плошчы".

Большая частка насаджэнняў (55,6 працэнта) створана з выкарыстаннем селекцыйнага пасяўнога і пасадачнага матэрыялаў. Дзякуючы пасадачнаму матэрыялу з закрытай каранёвай сістэмай у краіне з'явілася 6,3 тыс. га лясных культур (16 працэнтаў ад агульнага пасеву і пасадкі лесу). "Яго выкарыстанне дае магчымасць работнікам галіны прадоўжыць лесакультурны сезон і тым самым павялічыць аб'ёмы стварэння новых лясоў", - адзначылі ў Мінлясгасе.

Як і мінулыя гады, асаблівы акцэнт лясгасы зрабілі на аднаўленні ўчасткаў распрацаваных усохлых насаджэнняў: тут створана больш за 22 тыс. га лясных культур.

Арганізацыі лясной гаспадаркі самастойна забяспечваюць сябе неабходным пасадачным і пасяўным матэрыялам. "У галіне выбудавана і паспяхова функцыянуе сістэма лесаразвядзення і лесааднаўлення. Створаны ўсе ўмовы для вырошчвання здаровага, якаснага лесу: ад нарыхтоўкі, перапрацоўкі лесанасеннай сыравіны і захоўвання насення, вырошчвання стандартнага пасадачнага матэрыялу, правядзення мерапрыемстваў па лесааднаўленні і лесаразвядзенні да догляду лясных насаджэнняў і ўводу іх у катэгорыю каштоўных", - падкрэслілі ў прэс-службе.