Больш за Br12 млн сабрана па выніках рэспубліканскага суботніка. Аб гэтым паведаміў намеснік прэм'ер-міністра Леанід Заяц, паведамляе карэспандэнт БЕЛТА.

"Меркавалі, што будзе каля Br12 млн, а на сёння, паводле нашых даных, ужо ёсць Br12,3 млн. Нямала людзей прынялі ўдзел у суботніку. Прыведзены ў парадак пахаванні часоў Вялікай Айчыннай вайны, мемарыялы, комплексы, памятныя месцы, прыбраны скверы, паркі, прыдарожныя палосы. Частка насельніцтва прымала ўдзел у пасадцы лесу", - сказаў Леанід Заяц.

Сёння прэм'ер-міністр Раман Галоўчанка разам з віцэ-прэм'ерамі таксама прыняў удзел у рэспубліканскім суботніку. Кіраўніцтва ўрада і апарату Саўміна высадзіла саджанцы на плошчы 2,7 га ў Стаўбцоўскім лясгасе.

Палову грашовых сродкаў, заробленых у дзень правядзення рэспубліканскага суботніка, плануецца накіраваць Гомельскаму аблвыканкаму на рэканструкцыю мемарыяльнага комплексу вязням Азарыцкага лагера смерці (Калінкавіцкі раён). Яшчэ 50 працэнтаў пералічаць Брэсцкаму аблвыканкаму на стварэнне рэспубліканскага цэнтра патрыятычнага выхавання моладзі на базе Кобрынскага ўмацавання Брэсцкай крэпасці.

БелТА