Міністэрства антыманапольнага рэгулявання і гандлю 30 мая 2023 года прыняло пастанову нумар 37 "Аб тарыфах на перавозку грузаў па тэрыторыі Рэспублікі Беларусь чыгуначным транспартам агульнага карыстання", паведамляе БЕЛТА са спасылкай на Нацыянальны прававы інтэрнэт-партал.

Прававым актам устаноўлены тарыфы на перавозку грузаў па тэрыторыі Беларусі чыгуначным транспартам агульнага карыстання, акрамя перавозак грузаў, якія ідуць транзітам па тэрыторыі дзяржаў - членаў Еўразійскага эканамічнага саюза; работы (паслугі), звязаныя з арганізацыяй і ажыццяўленнем гэтай перавозкі.

Тарыфы ўстаноўлены без ПДВ. ПДВ спаганяецца ў адпаведнасці з заканадаўствам. Таксама дакументам зацверджана інструкцыя, якой вызначаны парадак устанаўлення і прымянення названых тарыфаў ва ўнутрырэспубліканскіх перавозках; у міжнародных перавозках (экспарт, імпарт, транзіт праз тэрыторыю Беларусі грузу, што перамяшчаецца паміж дзяржавамі - членамі ЕАЭС, паміж тэрыторыямі адной з дзяржаў-членаў з удзелам чыгункі Беларусі, з тэрыторыі адной дзяржавы-члена праз тэрыторыю Беларусі ў трэція краіны праз марскія парты дзяржаў-членаў і ў зваротным напрамку).

Інструкцыя прымяняецца перавозчыкамі грузу чыгуначнага транспарту агульнага карыстання і спажыўцамі іх паслуг. У прыватнасці, інструкцыяй урэгуляваны агульны парадак вызначэння правазной платы за перавозку; парадак вызначэння разліковай масы грузу; парадак вызначэння правазной платы за перавозку негабарытнага грузу, грузу на счэпе вагонаў, небяспечнага грузу, грузу ў рэфрыжэратарным вагоне, у вагоне-цыстэрне і іншае.

Пастанова Міністэрства антыманапольнага рэгулявання і гандлю ад 21 студзеня 2021 года нумар 4 "Аб тарыфах на перавозку грузаў па тэрыторыі Рэспублікі Беларусь чыгуначным транспартам агульнага карыстання" прызнаецца страціўшай сілу.

Прававы акт уступае ў сілу праз 5 дзён пасля яго афіцыйнага апублікавання.

БелТА