Пенсіі ў Беларусі будуць павышаны з 1 снежня на 5 працэнтаў. Такое рашэнне кіраўніка дзяржавы было агучана 10 лістапада ў час даклада Прэзідэнту Беларусі Аляксандру Лукашэнку аб удасканаленні работы ФСАН і мерах па ўзмацненні падтрымкі пенсіянераў і дзяцей-інвалідаў, перадае карэспандэнт БЕЛТА.

Асноўны дакладчык - міністр працы і сацыяльнай абароны Ірына Касцевіч. У ліку ўдзельнікаў мерапрыемства таксама віцэ-прэм'ер Ігар Петрышэнка, які курыруе гэту сферу, намеснік кіраўніка Адміністрацыі Прэзідэнта Максім Ермаловіч, міністр фінансаў Юрый Селіверстаў, старшыні Мінгарвыканкама і Мінаблвыканкама Уладзімір Кухараў і Аляксандр Турчын.

"Ведаю, што фонд (ФСАН. - Заўвага БЕЛТА) быццам бы нядрэнна працуе ў гэтым годзе. З нейкім нават прафіцытам. Але што нам, накопліваць гэтыя грошы, складваць у скарбонку, асабліва цяпер? Таму я падпісаў ужо ўказ аб павелічэнні (пенсій.- Заўвага БЕЛТА). Хоць крыху, але пенсіі нашым пенсіянерам з 1 снежня на 5-6 працэнтаў павялічым. Хаця павінен сказаць, калі лічыць макраэканамічна ў сярэднім, як гэта робіцца ва ўсім свеце, пенсіянеры не павінны на нас крыўдзіцца ў сувязі з невялікім павышэннем пенсіі", - сказаў Аляксандр Лукашэнка.

Ён адзначыў, што да гэтага ў бягучым годзе пенсіі павышаліся ўжо двойчы.

"Таму гэта ў сярэднім, падкрэсліваю. Гэта вышэй за інфляцыю на сённяшні дзень. Ну а калі мы яшчэ крок зробім, то гэта будзе ўжо значная перавага перад інфляцыяй, - падкрэсліў беларускі лідар. - Хоць, ведаеце, пенсіянеры пачуюць сёння мае развагі і скажуць: "Ну, напэўна, не валодае пытаннем, у нас сёе-тое там падаражэла, і не на 10 працэнтаў, а на 20 працэнтаў". Я нездарма падкрэсліў, што маю на ўвазе сярэдняе значэнне".

Кіраўнік дзяржавы дадаткова растлумачыў свой тэзіс, адзначыўшы і дзеянні ў сферы цэнаўтварэння: "Таму і да цэн некалькі разоў я звяртаўся. І сёння хачу падкрэсліць. Я разумею, што пенсіянер не купляе брэндавыя нейкія рэчы. Ён жыве сціпла і ў асноўным купляе прадукты харчавання, простае адзенне... І там, можа, на нейкія групы тавараў цэны выраслі больш за 10 працэнтаў, скажам так... Зразумела, што, можа, недзе крыху вышэй. Таму і было прынята рашэнне па рэгуляванні цэн і выпрацоўцы сістэмы цэнаўтварэння. Каб усё ж такі нашы людзі адчулі, што дзяржава бачыць гэтыя праблемы і спрабуе іх вырашыць. У снежні або студзені збяромся і паглядзім, наколькі эфектыўна ўрад і губернатары працуюць у напрамку стрымлівання цэн".

Што датычыцца выплаты пенсіі, Аляксандр Лукашэнка станоўча ацаніў практыку, калі выплаты, якія выпадаюць на святочныя дні, як 7 лістапада, робяцца загадзя. "Малайцы. Дробязь, але людзям прыемна, калі яны бачаць, што мы там на 2-3 дні крыху раней выплачваем гэтыя грошы. Гэта добра. У гэтым плане трэба дзейнічаць", - сказаў ён.

"Словам, фонд у гэтым годзе працуе, па дапамогу не звяртаўся ў бюджэт або іншыя якія-небудзь інстанцыі, крэдыты не браў, абыходзіцца сваімі сродкамі. Ёсць невялікі прафіцыт. Таму мы хоць няшмат, але павысім пенсіі нашым пенсіянерам з 1 снежня", - рэзюмаваў кіраўнік дзяржавы.

Міністр працы і сацабароны пацвердзіла, што цяпер бюджэт фонду сацыяльнай абароны насельніцтва выконваецца з прафіцытам, рэсурсы ёсць. Таму была прапанова зрабіць пераразлік працоўных пенсій. Кіраўнік дзяржавы гэту прапанову падтрымаў. "Дзякуй за тое, што падтрымалі нашу прапанову з 1 снежня бягучага года падняць пенсію на 5 працэнтаў", - сказала Ірына Касцевіч.

Паводле яе слоў, у выніку такога павышэння пенсія сярэдняга пенсіянера павялічыцца на Br125, калі параўноўваць снежань мінулага года са снежнем бягучага.

Як расказала Ірына Касцевіч журналістам пасля даклада кіраўніку дзяржавы, у гэтым годзе пераразлік працоўных пенсій праведзены двойчы: з 1 сакавіка - на 7 працэнтаў, з 1 жніўня - на 10 працэнтаў.

Чарговае павышэнне пенсій з 1 снежня бягучага года закране больш за 2 млн пенсіянераў. У сярэднім пенсія па ўзросце складзе Br670. "У кожнага пенсіянера гэты рост будзе розны, таму што ён залежыць ад памеру пенсіі, якую атрымлівае пенсіянер, - звярнула ўвагу міністр. - Гэта яшчэ адзін важны крок, які мы зрабілі ў бягучым годзе, вельмі пазітыўны і правільны".

БелТА