Сістэма асабліва ахоўных прыродных тэрыторый Беларусі ўключае 1338 аб'ектаў. Аб гэтым сказала на прэс-канферэнцыі "Экалагічны турызм: развіццё патэнцыялу асабліва ахоўных прыродных тэрыторый" у прэс-цэнтры БЕЛТА намеснік начальніка ўпраўлення біялагічнай і ландшафтнай разнастайнасці галоўнага ўпраўлення рэгулявання абыходжання з адходамі, біялагічнай і ландшафтнай разнастайнасці Міністэрства прыродных рэсурсаў і аховы навакольнага асяроддзя Людміла Барташэвіч.

"Асабліва ахоўныя прыродныя тэрыторыі - частка тэрыторыі Рэспублікі Беларусь з каштоўнымі прыроднымі комплексамі і (або) аб'ектамі, адносна якой устаноўлены асаблівы рэжым аховы і выкарыстання. Ва ўсім свеце асабліва ахоўныя прыродныя тэрыторыі як акумулятары асноўных рэсурсаў біялагічнай і ландшафтнай разнастайнасці ўяўляюць найбольшую цікавасць для развіцця экалагічнага турызму", - сказала Людміла Барташэвіч.

Паводле яе слоў, на 1 студзеня 2023 года сістэма асабліва ахоўных прыродных тэрыторый Беларусі ўключае 1338 аб'ектаў, у тым ліку адзін запаведнік, чатыры нацыянальныя паркі, 99 заказнікаў рэспубліканскага значэння, якія з'яўляюцца асноўнымі аб'ектамі для наведвання з мэтай азнаямлення з прыроднымі багаццямі краіны.

"Унікальнымі прыроднымі аб'ектамі таксама з'яўляюцца заказнікі і помнікі прыроды мясцовага значэння, якіх большасць. Асабліва ахоўныя прыродныя тэрыторыі характарызуюцца спрыяльным экалагічным станам і наяўнасцю вялікай разнастайнасці прыродных рэсурсаў (рэдкіх форм рэльефу, маляўнічых азёр і месцаў пражывання знікаючых відаў флоры і фаўны), і ўяўляюць сабой ідэальныя аб'екты для экалагічнага турызму", - дадала намеснік начальніка ўпраўлення.

Агульная плошча асабліва ахоўных прыродных тэрыторый складае 1,9 млн га, або 9,1 працэнта тэрыторыі Беларусі.

БелТА