Выплаты па бальнічных лістах у Беларусі вырастуць з 1 ліпеня 2024 года, піша Sputnik са спасылкай на Міністэрства працы і сацыяльнай абароны.

Раней планавалася, што новаўвядзенні запрацуюць з 1 студзеня гэтага года. "Перанос тэрміну абумоўлены запытамі прадпрыемстваў і арганізацый", - растлумачылі ў Мінпрацы. Паводле інфармацыі ведамства, арганізацыям патрэбны час, каб адаптаваць праграмнае забеспячэнне да новых норм.

Раней паведамлялася, што мінімальны памер бальнічных выплат прывяжуць да мінімальнай заработнай платы. Па старых нормах база для разліку - палова бюджэту пражытачнага мінімуму. Гэта значыць мінімальны памер выплат - 169,92 рубля. Паколькі мінімальная зарплата з 1 студзеня складае 554 рублі, то відавочна, што сума вырасце.

Таксама вырашана змяніць і іншыя нормы па бальнічных. Работнік, у якога стаж большы за 10 гадоў, атрымлівае 100 % страчанага заробку з першага дня хваробы (па-старому за першыя 12 дзён кампенсуюць 80 %, астатнія - поўнасцю). Калі стаж меншы за 10 гадоў, то з першага дня хваробы будзе аплачвацца толькі 80 %.

Акрамя таго, зменіцца перыяд, за які разлічваюць бальнічны. Будуць улічвацца апошнія 18 месяцаў, а не паўгода, як зараз. Выключэнне складуць прастоі і водпускі за свой кошт па ініцыятыве наймальніка, перыяды часовай непрацаздольнасці і перыяды атрымання іншых сацыяльных выплат.

Ёсць новая норма і для тых, у каго няма асноўнага месца працы, але ёсць праца па сумяшчальніцтве. Ім бальнічны прызначаць па адным з месцаў працы па сумяшчальніцтве (па выбары работніка).

tvr.by